Wezîrê Dadê yê Libnanê Adil Nesar di parvekirineke xwe de li ser X`ê dan û standinên di navbera Îran û Amerîkayê de şîrove kir.
Adil Nesar diyar kir ku destpêkirina dan û standinên rasterast ên Îranê bi Amerîkayê re nîşan didin ku Îran di nêzîkatiya xwe de bi guhertinekê difikire.
Nesar her wiha got ku Îranê şertê agirbesteke berfireh terikandiye û wiha lê zêde kir:
“Îran ji bo berdana pereyên xwe li ser maseyê rasterast bi Amerîkayê re dan û standinan dike.”
Wezîrê Dadê yê Libnanî di posta xwe de pirsî: "Gelo piştî hemû şer, serpêhatî, karesat û eniyên piştgiriyê, hemû Libnanî bawer bûne ku vebijêrka yekane û rizgarker Libnan e, tenê Libnan?"
Piştî 40 rojî ji şerê berdewam yê di navbera Amerîka-Îsraîl û Îranê de, Serokê Amerîkayê agirbest heta 2 hefteyan ji bo dan û standinan ragihand.
Piştî ku agirbesta bi Îranê re dest pê kir, Îsraîlê êrîşên esmanî yên giran li ser taxên başûrê Beyrûtê û deverên din ên Libnanê pêk anî.
Her wiha Îranê destnîşan kiribû ku di nava şertên bingehîn ên dan û standinan de, agirbesta li Libnanê jî hebû.
