Îro Şandeyeke wezaretê ya Hikûmeta Veguhêz a Sûriyê bi serokatiya Wezîrê Derve Esed Şeybanî gihaşt Urdunê.
Ev şande ji bo beşdarî xebatên gera duyemîn a Meclisa Bilind a Hevkariyê ya di navbera her du welatan de bibe.
Piştî civîna yekemîn a ku di gulana par de li Şamê hatibû lidarxistin, ev ger li Emanê hat organîzekirin.
Şandeya Sûriyê ji aliyê Cîgirê Serokwezîrê Urdunê û Wezîrê Derve Eymen Sefedî ve hate pêşwazîkirin.
Her du wezîran beriya destpêkirina rûniştinê li ser têkiliyên dualî û mijarên girîng ên hevpar gotûbêj kirin.
Piştre civîna wezîrên Meclisa Bilind a Hevkariyê ya Sûriyê û Urdunê bi beşdariya şandeyên her du welatan dest pê kir.
Ev yek di çarçoveya hewldanên hevbeş ên xurtkirina têkiliyên dualî û berfirehkirina warên hevkariyê di navbera her du welatan de di tevahî beşan de pêk tê.
Di civînê de 9 peyman têkildarî beşên pîşesazî, bazirganî, tenduristî, karûbarên civakî, ewqafê (olî), perwerdehiya bilind, edalet û dadwerî, ragihandin, tûrîzm, poste û dravdana elektronîk hatin îmzekirin.
Li gorî ajansa SANA'yê di dawiya rûniştinan de wiha hate gotin:
“Mekanîzmeya hawirdekirina nû ya li ser rêgeza beramberiyê ku wê ji 10ˊê Nîsana 2026ˊan ve dest pê bike, wê were destpêkirin.
Komîteyeke veberhênanê ya hevbeş wê were avakirin û deriyê Nesîb û Cabir bi pergala xebitandinê ya 24 saetan wê were bipêşxistin.
Dîsa li gorî heman çavkaniyê di civînê de, li ser xurtkirina hevkariyê di beşên enerjî, veguhastin, girêdana eleketrîk û gazê hat gotûbêjkirin.”
Her wiha ji nû ve aktîvkirina xeta trênê û hevkariya di beşa avê de bi rêya pêşxistina Hawiza Yermûkê wê xebat bên kirin.
