ڕاسپێردراوی وەزارەتی دارایی بۆ دامەزراندنی "بانکی نیشتمان" هۆشداری لە بڵاوبوونەوەی هەواڵی ناڕاست و زیادەڕۆیی لەسەر بانکەکە دەدات و ڕایدەگەیەنێت کە پڕۆسەی دامەزراندنەکە لە قۆناغی جێبەجێکردندایە و هەر پێشھاتێک تەنیا بە فەرمی ڕادەگەیەنرێت.
د. هاوڕێ کەمال، ڕاوێژکاری یاسایی و ڕاسپێردراوی وەزارەتی دارایی بۆ دامەزراندنی بانکی نیشتمان، لە ڕوونکردنەوەیەکدا کە ئەمڕۆ (١٩ی تەممووزی ٢٠٢٦) بڵاویکردەوە، ئاماژەی بەوە کردووە کە ماوەیەکە چەندین هەواڵ، لێدوان و بابەتی ڕۆژنامەوانی لەسەر هەنگاوەکانی دامەزراندنی بانکەکە و خزمەتگوزارییە داهاتووەکانی بڵاودەکرێنەوە، کە زۆرجار زیادەڕۆیی و زانیاری ناڕاستیان تێدایە.
ڕاسپێردراوی وەزارەتی دارایی بۆ ئاگادارکردنەوەی ڕای گشتی و میدیاکان ڕایگەیاند، لە ئێستادا هەنگاوەکانی دامەزراندنی بانکی نیشتمان لە قۆناغی جێبەجێکردندان و پڕۆسەی تاقیکردنەوە و چاوپێکەوتن بۆ دیاریکردنی بەڕێوەبەر، یاریدەدەری بەشەکان و فەرمانبەرانی بانکەکە بەڕێوەدەچێت.
د. هاوڕێ کەمال جەختی لەوەش کردەوە کە هەر زانیاری و بەرەوپێشچوونێک لەسەر قۆناغەکانی داهاتووی بانکەکە هەبێت، بە شێوەیەکی فەرمی تەنیا لە لاپەڕەی وەزارەتی دارایی بڵاودەکرێتەوە.
ئاماژەی بەوەش دا کە هەر کەس، لایەن یان بەرپرسێک لە وەزارەتە جیاوازەکانەوە لێدوان و شیکردنەوە لەسەر هەنگاوەکانی ئەو بانکە بدات، تەنیا گوزارشت لە ڕای تایبەتی خۆی دەکات و وەزارەتی دارایی هیچ بەرپرسیارێتییەک لەو لێدوانانە هەڵناگرێت.