وەزارەتی دەرەوەی ئەمریکا ڕایگەیاند کە لەمڕۆوە، یەکی تشرینی یەکەم، سوریا لە لیستی ئەو وڵاتانە دەرهێنراوە کە پێشتر مامەڵەی چەک و گرێبەستی سەربازییان لەگەڵ قەدەغە بوو، و هەر داواکارییەکیش بۆ پێدانی کەرەستەی سەربازی لەلایەن واشنتۆنەوە وردبینی و هەڵسەنگاندنی بۆ دەکرێت.
بەگوێرەی ڕاگەیەنراوەکەی وەزارەتی دەرەوەی ئەمریکا، ئەم بڕیارە کە لە ١٩ی ئابی ڕابردوودا لەلایەن مارکۆ ڕۆبیۆ، وەزیری دەرەوەی ئەمریکاوە واژۆ کرابوو و ئەمڕۆ دەچێتە بواری جێبەجێکردنەوە، بە پشتبەستن بە چەند یاسایەکی وڵاتەکە دەرچووە. وەزارەتەکە هۆکارەکەی بۆ ئەوە گەڕاندەوە کە سوریا دوای ڕووخانی ڕژێمی ئەسەد لە لیستی تیرۆر هێنراوەتە دەرەوە، چەکە کیمیایی و بایۆلۆجییەکانی لەناوبردووە و ڕێکارەکانی پەیوەندیدار بە ڕووبەڕووبوونەوەی تیرۆری جێبەجێ کردووە.
سەرەڕای ئەم هەنگاوە لە سۆنگەی سووککردنی سزاکان و دەستپێکردنی قۆناغێکی نوێ لە پەیوەندییەکانی نێوان دیمەشق و واشنتۆن، بەڵام وەزارەتی دەرەوە ڕوونی کردەوە کە ئەمە بە مانای پێدانی ڕاستەوخۆی چەک نایەت، بەڵکو هەر داواکارییەکی گرێبەستی سەربازی بەدواداچوونی بۆ دەکرێت پێش ئەوەی بڕیاری ڕەزامەندی یان ڕەتکردنەوەی لەبارەوە بدرێت.