حکومەتی عێراق لە چوارچێوەی گەڕان بەدوای ڕێڕەوی جێگرەوەدا، کار بۆ نوژەنکردنەوە و زیندووکردنەوەی هێڵی بۆریی نەوتی کەرکووک - بانیاسی سووریا دەکات؛
ئەم پرسەش بووەتە یەکێک لە تەوەرە سەرەکییەکانی دیداری بەرپرسانی عێراق لەگەڵ لایەنی ئەمریکی لە واشنتن.
پڕۆژەکە بە هاوئاهەنگی لە نێوان ئیدارەی ئەمریکا و حکومەتی عێراقدا تاوتوێ دەکرێت، کە تێیدا هەوڵدەدرێت بۆریی نەوتی نێوان هەردوو وڵات کە درێژییەکەی 800 کیلۆمەترە و مێژووی دروستکردنی بۆ ساڵی 1952 دەگەڕێتەوە، سەرلەنوێ نۆژەن بکرێتەوە.
ئامانج لەم هەنگاوەش، دۆزینەوەی دەروازەیەکی نوێیە بۆ بازاڕەکانی جیهان، بەتایبەت دوای ئەوەی بەهۆی ئاڵۆزییە سەربازییەکان و داخستنی گەرووی هورمزەوە، بەغدا لە هەناردەکردنی نەوتەکەیدا تووشی گرفتی گەورە بوو.
وەزارەتی نەوتی عێراق ڕایگەیاندووە کە دەستکراوە بە جێبەجێکردنی پلانەکان بۆ دۆزینەوەی ڕێڕەوی جێگرەوە و پڕۆژەی هێڵی بۆریی نەوتی عێراق بۆ بەندەری بانیاسی سووریا خراوەتە بواری جێبەجێکردنەوە. ئەم هێڵە لە توانایدایە لە قۆناغی یەکەمدا ڕۆژانە 300 هەزار بەرمیل نەوتی عێراق بگەیێنێتە سەر دەریای ناوەڕاست.