خەڵکی سوەیدا بە گردبوونەوەیەکی بەرفراوان داوای مافەکانیان دەکەن

بە بۆنەی تێپەڕبوونی ساڵێک بەسەر ڕووداوە توندوتیژەکانی تەممووزی 2025لە پارێزگای سوەیدا، گردبوونەوەیەکی جەماوەریی بەرفراوان لە ناوەندی شارەکە ساز کرا.

لەم یادەدا، دەیان هاووڵاتی لەگەڵ شێخ و ڕیشسپیانی پێکهاتەی مەزهەبیی درووز بەشدار بوون و وێنەی قوربانییان، دەستبەسەرکراوان و ڕفێندراوانی ئەو ڕووداوانەیان بەرز کردەوە.

تەلال عامر، فەرماندەی هێزەکانی پارێزەرانی نیشتمانی لە سوەیدا، لە گوتارێکدا لە کاتی گردبوونەوەکەدا ڕایگەیاند کە سەرەڕای ئەو ئازار و برینە قورسانەی بە جەستەی پارێزگاکەوەن، سوەیدا هەمیشە وەک سیمبولی هێز و بەردەوامی دەمێنێتەوە. ناوبراو ئاماژەی بەوەش دا کە لە ڕۆژانی داهاتوودا مژدەی خێر و شوێنەواری ئەرێنی بۆ ناوچەکە لەڕێگەن.

شێخ فادی بەدریە، یەکێک لە ڕیشسپیانی دیاری پێکهاتەی درووز، ئەو ڕووداوانەی ساڵی ڕابردووی بە هێرشێکی دڕندانە وەسف کرد و گوتی: گەلی سوەیدا لەبەردەم ئەو نەهامەتییانەی بەسەر پارێزگاکەدا هاتن دەنگی خۆیان یەکخست. ئەم ڕووداوانە هاوپشتیی نێوانمان و پابەندبوونمان بە بەها و بیروباوەڕەکانمانەوە زیاتر چەسپاند".

هاوکات شێخ جادوڵا ئەبو فەخر، لە ڕیشسپیانی شارۆچکەی "کەفر ئەللەهەف" ڕایگەیاند، ئەم ساڵیادە وەک لەدایکبوونێکی نوێ و پەیامێکی پڕ لە هێز وایە، و دووپاتی کردەوە کە داواکردنی مافە ڕەواکانی خەڵکی سوەیدا بە هیچ شێوەیەک دژ بە بنەما و بەها نیشتمانییەکانی ئەوان نییە.

لە تەممووزی ساڵی 2025دا، پارێزگای سووەیدا ڕووبەڕووی شەپۆلێکی یەکجار توندی توندوتیژی بووەوە. بەپێی ئامارە ناوخۆییەکان و ڕاپۆرتی ڕێکخراوەکانی مافی مرۆڤ، ئەو ئاڵۆزییانە بوونە هۆی کوژرانی زیاتر لە هەزار کەس و برینداربوونی سەدان هاووڵاتی دیکە.

جیا لەوەش، بە دەیان کەس دەستبەسەر کران یان ڕفێندران و بە هەزاران خێزانیش لە گوندەکانی خۆیانەوە کۆچبەر کران کە تاوەکو ئێستاش زۆربەی ئەو خێزانانە نەیانتوانیوە بگەڕێنەوە سەر ماڵ و حاڵی خۆیان.