عەبدولڕەحیم جاسم ئەلشمەری، وەزیری کشتوکاڵی عێراق لە بەغدا پێشوازی لە بێگەرد تاڵەبانی، وەزیری کشتوکاڵ و سەرچاوەکانی ئاوی هەرێمی کوردستان کرد و لە کۆبوونەوەیەکدا هەردوولا جەختیان لەسەر دارشتنی نەخشەڕێگایەکی هاوبەش بۆ یەکلاییکردنەوەی دۆسیە هەڵپەسێردراوەکان، دەستەبەرکردنی ئاسایشی خۆراک و بەهێزکردنی هەماهەنگیی نێوان هەردوولا کردەوە.
لە دیدارەکەدا، وەزیری کشتوکاڵی عێراق ڕێنمایی دا بە پێکهێنانی لیژنەیەکی هاوبەشی خولیی بە مەبەستی لابردنی ئاستەنگەکان و پاراستنی سەروەت و سامانی ڕووەکی و ئاژەڵی.
هاوکات وەفدی هەرێمی کوردستانیش داوای کرد تەواوی بەرهەمی گەنمی جووتیاران وەرگیرێت و ڕۆژژمێری کشتوکاڵی لە نێوان هەردوولادا یەک بخرێت.