سەرچاوەیەکی ئەمنی لە بەغدا ڕایگەیاند، هێزەکانی سەر بە دەستەی دەستپاکی عێراق، بەڕێوەبەری کۆمپانیای گشتیی بەرهەمهێنانی وزەی کارەبای فوراتی ناوەڕاست و ژمارەیەک لە فەرمانبەرانی ناو کۆمپانیاکەیان دەستگیر کردووە.
ئەم ڕێکارە یاساییە نوێیە لە کاتێکدایە، دەسەڵاتداران هەڵمەتەکانیان بۆ ڕووبەڕووبوونەوەی گەندەڵی لە دامودەزگاکانی دەوڵەتدا چڕتر کردووەتەوە.
ئەم دەستگیرکردنە بەشێکە لەو هەڵمەتە توند و بەرفراوانەی، کە لە ڕێککەوتی 28ی حوزەیرانی 2026ەوە لە لایەن هێزە ئەمنییەکان و لایەنە پەیوەندیدارەکانی دژە گەندەڵی لە بەغدای پایتەخت و سەرجەم پارێزگاکانی عێراق دەستی پێکردووە.
لەو هەڵمەتە تا ئێستا چەندین پەرلەمانتار، کەسایەتیی سیاسی و بازرگانی گرتووەتەوە و پشکنین بۆ ماڵەکانیان کراوە، ئەمەش لەسەر بنەمای تۆمەتی بەهەدەردانی سامانی گشتی و دەوڵەمەندبوونی نایاسایی.
هەر لە چوارچێوەی ئەم هەڵمەتەدا، دوێنێ دەستەی دەستپاکی فیدراڵی ئاشکرای کرد، کە توانیویانە بەڕێوەبەری کارە سەربازییەکان لە وەزارەتی بەرگری لەگەڵ ژمارەیەک لە ئەفسەرانی پلەباڵای ناو وەزارەتەکە دەستگیر بکەن و ڕووبەڕووی لێکۆڵینەوەی یاساییان بکەنەوە.
بەرپرسێکی باڵای دیکە لە عێراق لەسەر دۆسیەی گەندەڵی دەستگیرکرا
