فەریق ئەوەل ڕوکن عەبدولئەمیر ڕەشید یارەڵڵا، سەرۆکی ئەرکانی سوپای عێراق، لە پەیامێکدا پیرۆزبایی ڕاگەیاندنی پرۆسەی یەکخستنەوەی هێزەکانی پێشمەرگەی کرد و پرۆسەکەی بە دەستکەوتێکی سەربازیی گرنگ بۆ عێراق وەسف کرد.
لە پەیامەکەیدا، سەرۆکی ئەرکانی سوپای عێراق ستایشی ڕۆڵی سەرکردایەتی سیاسی و سەربازیی هەرێمی کوردستانی کرد لە یەکخستن و پەرەپێدانی تواناکانی پێشمەرگە، لەوانەش، نێچیرڤان بارزانی سەرۆکی هەرێمی کوردستان، مەسرور بارزانی سەرۆکی حکومەتی هەرێمی کوردستان، قوباد تاڵەبانی جێگری سەرۆکی وەزیران، شۆڕش ئیسماعیل وەزیری پێشمەرگە و فەریقی ڕوکن عیسا عوزیر سەرۆکی دەستەی ئەرکانی پێشمەرگە.
فەریق یارەڵڵا ئاماژەی بەوە کرد کە بڕیاری یەکخستنەوەی پێشمەرگە وێستگەیەکی سەرەکییە بۆ ڕێکخستن و بەرزکردنەوەی دیسپلین و ئامادەیی هێزەکان.
هەروەها جەختی لە گرنگیی بەردەوامیی هاوکاری و هەماهەنگیی نێوان سوپای عێراق و پێشمەرگە کردەوە تاوەکو وەک دوو کۆڵەکەی ڕەسەنی بەرگریی نیشتمانی بپارێزرێن، بە تایبەت کە لە شەڕی دژی تێرۆردا سەلماندیان بە یەکگرتوویی دەتوانن ئاسایش و سەقامگیری بۆ تەواوی ناوچەکە دەستەبەر بکەن.