عەلی زەیدی، سەرۆکوەزیرانی عێراق داوا لە ئەنجومەنی نوێنەران دەکات 44 پڕۆژەیاسای گرنگ پەسند بکات، لەوانەش پڕۆژەیاسای حەشدی شەعبی و هەمواری یاسای وەبەرهێنان، بە مەبەستی پاڵپشتیکردنی پڕۆسەی ئاوەدانکردنەوە و گەشەپێدانی وڵات.
بە گوێرەی ڕاگەیەندراوێکی نووسینگەی ڕاگەیاندنی سەرۆکوەزیرانی عێراق، ئەمڕۆ شەممە، 5ی ئەیلولی 2026، عەلی زەیدی لە کاتی پێشوازیکردن لە فراکسیۆنی ئاوەدانکردنەوە و گەشەپێدان جەختی کردەوە کە دەرکردنی ئەو یاسایانە بنەمای سەرەکیی گەشەپێدان و پڕکردنەوەی پێداویستییەکانی ناوخۆن. لە نێو پڕۆژەیاساکاندا ئاماژە بە پڕۆژەیاساکانی دەستەی دەرمان و خۆراک، حەشدی شەعبی، دەستەی چاودێریی ناوخۆیی و هەمواری یاسای وەبەرهێنان کراوە.
لە بەرامبەردا، سەرۆک و ئەندامانی فراکسیۆنەکە پشتیوانیی تەواوی خۆیان بۆ سەرۆکوەزیران و هەنگاوەکانی حکومەت لە بەرەنگاربوونەوەی گەندەڵی و چاکسازیی ئابووریدا دەربڕی. هەروەها جەختیان لە گرنگیی پەسندکردنی "یاسای نەوت و گاز" کردەوە و ستایشی دەستپێشخەرییە نوێیەکەی سەرۆکوەزیرانیان کرد بۆ دابەشکردنی یەک ملیۆن پارچە زەویی نیشتەجێبوون بەسەر هاوڵاتییاندا.