جێگری سەرۆکی مەهەپە وردەکاریی پێکهاتە و ئەرکەکانی کۆمسیۆنی بەدواداچوون و چاودێریکردنی پەرلەمانی ئاشکرا دەکات و ڕادەگەیەنێت، سەرجەم فراکسیۆنە پەرلەمانییەکان تێیدا ئەندام دەبن.
فەتحی یڵدز، جێگری سەرۆکی گشتیی پارتی نەوەپەرستی تورکیا (مەهەپە)، لە ڕێگەی پۆستێکەوە لە تۆڕی کۆمەڵایەتیی ئێکس، نەخشەڕێگە و ئەرکەکانی کۆمسیۆنی بەدواداچوون و چاودێریکردنی پەرلەمانی خستەڕوو.
بەگوێرەی لێدوانەکەی جێگری سەرۆکی مەهەپە، لە ساڵی نوێی یاساداناندا و لە چوارچێوەی جێبەجێکردنی "یاسای چوارچێوە"دا، کۆمسیۆنێکی تایبەت بە بەدواداچوون و چاودێریکردن پێکدەهێنرێت و گشت ئەو حزبانەی کە خاوەن فراکسیۆنن لە پەرلەمانی تورکیادا، بەپێی ڕێژەی کورسییەکانیان نوێنەرایەتییان لەو کۆمسیۆنەدا دەبێت.
ئەرکەکانی کۆمسیۆنەکە کامانەن؟
چاودێریی ورد: کۆمسیۆنەکە لە نزیکەوە چاودێریی چۆنیەتیی بەڕێوەچوونی پرۆسەکە و جێبەجێکردنی یاسای چوارچێوە دەکات.
پێشکەشکردنی پێشنیار: بەپێی ئەوکار و بەرەوپێشچوونانەی لە میدانیدا دەبن، ڕێوشوێن و پێشنیاری پێویست ئاراستەی لایەنە پەیوەندیدارەکان دەکات.
هەڵسەنگاندنی کۆتایی: پێشنیار و ڕاسپاردەکانی دەستەی بەدواداچوون و هەڵسەنگاندن دەبرێنە پەرلەمان و دواتر لەلایەن کۆمسیۆنی بەڕێوەبردنەوە لێکۆڵینەوە و هەڵسەنگاندنیان بۆ دەکرێت.