بەگوێرەی ڕاگەیەندراوی ناوەندی مافی مرۆڤی کوردپا، لە ماوەی مانگێکی ڕابردوودا لە ١٥ شار و ناوچەی جیاوازی ڕۆژهەڵاتی کوردستان، لانیکەم ٦٣ هاووڵاتی لەلایەن هێزە ئەمنییەکانی ئێرانەوە دەستبەسەر کراون و چارەنووسی بەشێک لە دەستبەسەرکراوەکان نادیارە.
بە گوێرەی ئامارەکانی ناوەندەکە، شارەکانی بۆکان بە ٩ کەس، مەهاباد بە ٨ کەس و مەریوان بە ٧ کەس زۆرترین ڕێژەی دەستبەسەرکرانیان تۆمار کردووە، و لە نێو کۆی دەستبەسەرکراوەکاندا ٥ ژن و ٢ مێردمنداڵی خوار ١٨ ساڵ هەن.
کوردپا جەخت دەکاتەوە کە ئەم ئامارانە تەنها ئەو حاڵەتانە دەگرێتەوە کە تۆمار کراون و گەیشتوونەتە دەستیان، بۆیە مەترسیی ئەوە هەیە ژمارەی ڕاستەقینەی دەستبەسەرکراوان لەوە زیاتر بێت.