بەگوێرەی ئامارە فەرمییەکان، ڕێژەی لەدایکبوون لە پارێزگای ئیلامی ڕۆژهەڵاتی کوردستان دابەزینێکی مەترسیداری تۆمار کردووە و تێکڕای منداڵبوون بۆ هەر ژنێک بۆ نزیکەی یەک منداڵ دابەزیوە، ئەوەش نیگەرانیی لێكەوتووەتەوە.
بەپێی ئاماری زانکۆی زانستە پزیشکییەکانی ئیلام، کەمبوونەوەی ڕێژەی لەدایکبوون لە پارێزگاکە بووەتە هۆی کەمبوونەوەی بەرچاوی ژمارەی گەنجان و لە بەرامبەردا زۆربوونی ڕێژەی بەساڵاچووان.
بەرپرسی بەشی تەندروستی لە زانکۆی ئیلام بە میدیای ئێرانی ڕاگەیاندووە، تێکڕای ڕێژەی منداڵبوون بۆ هەر ژنێک لە پارێزگاکە گەیشتووەتە نزیکەی یەک منداڵ، و هۆشداری داوە کە ئەم دۆخە دەبێتە هۆی ئەوەی لە هەر نەوەیەکدا ژمارەی دانیشتووان بۆ نیوە کەمببێتەوە.
هاوکات، ئەنجامی توێژینەوەیەک کە بە هاوکاریی زانکۆی پارێزگاری ئیلام ئەنجامدراوە، دەریدەخات کە هۆکارە ئابوورییەکان و قەیرانی بژێوی وەکو سەرەکیترین هۆکاری دابەزینی ڕێژەی هاوسەرگیری و منداڵبوون لە ناوچەکەدا دەستنیشان کراون.