گوتەبێژی ڕاگەیاندنی پارتی ژیانی ئازادی کوردستان (پژاک) ڕایگەیاند، ئەو لایەنانەی دەدەنە پاڵ پرۆسەی چارەسەری لە باکووری کوردستان کە گوایە پەیوەندیی بە پژاکەوە هەیە، دەیانەوێت پرۆسەکە تێکبدەن و جەختیشی کردەوە کە قسەکردن لەسەر چەکدانانی پژاک خەیاڵێکی خاوە.
گەلاوێژ ئەورین، گوتەبێژی ڕاگەیاندنی پژاک، لە لێدوانێکدا ئاماژەی بەوە دا کە دۆخی ئێران بە تەواوی لە تورکیا و سووریا جیاوازە و تاوەکو کۆماری ئیسلامیی ئێران دەست لە سیاسەتی کوشتار، لەسێدارەدان و دەستگیرکردن هەڵنەگرێت و دانی فەرمی بە مافی گەلی کورد و سەرجەم پێکهاتەکاندا نەبنێت، باسكردن لە چەکدانانی پژاک بێواتایە.
ناوبراو ئەوەشی خستە ڕوو کە پژاک بە هیچ شێوەیەک لەژێر گوشاردا چەک دانانێت و خەباتەکەی بۆ بەدیهێنانی کۆمارێکی دیموکراتیک بەردەوام دەبێت.
لە کۆتایی لێدوانەکەیدا، ئەورین ئاشکرای کرد کە لە مانگەکانی داهاتوودا گۆڕانکاریی گەورە لە ئێراندا ڕوو دەدەن و پژاک بە تەواوی خۆی بۆ ڕووبەڕووبوونەوە و پێشوازی لەو گۆڕانکارییانە ئامادە کردووە.