ئەمڕۆ، لەبەردەم دادگای شاری مەهاباد لە ڕۆژهەڵاتی کوردستان، شەڕ و ئاڵۆزی لە نێوان چەند کەسێکدا دروست بوو و دەستڕێژی گولەکە کرا، کە لە ئەنجامدا کەسێک کوژرا و چوار کەسی دیکەش بریندار بوون.
بەگوێرەی زانیارییە خۆجێییەکان و کێشەکە لە بنەڕەتدا کۆمەڵایەتی بووە و لە نێوان ئەندامانی دوو خێزاندا هاتووەتە ئاراوە. سەرەتا ناکۆکی و دەمەقاڵێ لە نێوان چەند ژنێکەوە سەری هەڵداوە.
ئەو کەسەی تەقەی کردووە، منداڵەکەی چەند ساڵێک لەمەوبەر کوژراوە و ئەمڕۆ بە مەبەستی تۆڵەسەندنەوە تەقەی لە ئەندامانی ئەو خێزانە کردووە کە تۆمەتبار بوون بە کوشتنی منداڵەکەی.
کەسانی تێوەگلاو لەم شەڕەدا خەڵکی مەهاباد نەبوون، بەڵکو بۆ بەدواداچوون و بەشداریکردن لە دانیشتنێکی دادگادا سەردانی ئەو شارەیان کردبوو.
دوای ڕووداوەکە، هێزە ئەمنییەکان دەستبەجێ دەستوەردانیان کرد و تۆمەتباری تەقەکەریان دەستگیر کرد، لێکۆڵینەوە لە وردەکاری و هۆکارەکانی دیکەی ئەم توندوتیژییەش بەردوامە.