شاندی باڵای دانوستانکاری حکوومەتی هەرێمی کوردستان لە پیرمام لەگەڵ مەکتەبی سیاسی و فراکسیۆنی پارتی دیموکراتی کوردستان لە ئەنجومەنی نوێنەران کۆبووەوە، بۆ تاوتوێکردنی نوێترین دەرئەنجامی گفتوگۆکانی تایبەت بە پڕۆژەیاسای بودجەی گشتیی عێراق بۆ ساڵی 2027.
لەو کۆبوونەوەیەدا کە کاتژمێر 11:00ی پێشنیوەڕۆ دەستی پێکرد، شاندی حکوومەت وردەکاریی لێکتێگەیشتنەکان و شایستە داراییەکانی هەرێمی بەپێی دانوستانەکانی لەگەڵ حکوومەتی فیدراڵی خستە ڕوو، بە ئامانجی دروستکردنی هەماهەنگیی تەواو لەگەڵ نوێنەرانی پەرلەمان بۆ بەرگریکردن لە مافە دەستوورییەکانی هەرێم لە بەغدا.
ئەم دیدارەی پیرمام دەستپێکی گەڕێکی نوێی سەردانەکانی شاندی دانوستانکارە بۆ لای سەرجەم حیزبە سیاسییەکانی هەرێمی کوردستان، بە مەبەستی پێکهێنانی کارنامەیەکی هاوبەشی نیشتمانی و دروستکردنی بەرەیەکی ناوخۆیی بەهێز بۆ بەدەستهێنانی پشکی شایستەی هەرێم لە پڕۆژەیاسای بودجەدا.