بەڕێوەبەرایەتیی پۆلیسی دارستان و ژینگەی پارێزگای سلێمانی رایگەیاند، لە چەند ڕۆژی ڕابردوودا ئاگرێکی فراوان لە سنووری گوندی کانی خان لە قەزای دوکان کەوتەوە.
بەڕێوەبەرایەتییەکە لە راگەیەنراوێکدا دەڵێ، دوای کۆنترۆڵکردنی ئاگرەکە لەلایەن مەفرەزەکانی بنکەی پۆلیسی دارستان و ژینگەی مێرگەپانەوە، لێکۆڵینەوە و بەدواداچوونی ورد بۆ هۆکاری ڕووداوەکە دەستیپێکرد و لە ئەنجامدا توانرا کەسێک بە تۆمەتی هۆکاربوون لە کەوتنەوەی ئاگرەکە دەستگیر بکرێت.
بەهۆی ئاگرەکەوە نزیکەی 30 دۆنم لە لەوەڕگە، پۆش و پاوان و دارستانی سروشتی و رەز و باخی هاوڵاتییان سووتان. ئاماژە بەوەشکراوە، پەڕاوی لێکۆڵینەوە بۆ تۆمەتبارەکە کراوەتەوە، بە مەبەستی وەرگرتنی رێکاری یاسایی بەرانبەری.
پۆلیسی دارستانی سلێمانی: تۆمەتباری ئاگرکەوتنەوەکەی گوندی کانی خان دەستگیرکرا
