سەرچاوەکانی پارتی یەکسانی و دیموکراسیی گەلان (دەم پارتی) زانیاریی نوێیان سەبارەت بە وردەکارییەکانی پرۆسەی ئاشتی و چارەسەرکردنی پرسی کورد لە تورکیا خستە ڕوو.
بەپێی ئەو زانیارییانەی لە ماڵپەڕی (ئیلکە تیڤی) و لەسەر زاری ڕۆژنامەنووس دیلەک ئۆداباش بڵاو کراونەتەوە، عەبدوڵا ئۆجالان لە کۆمیسیۆنی چەکداماڵین و کۆردیناسیۆنی ستراتیژیدا، نەک وەک ئەندام، بەڵکو وەک «ڕێکخەری سەرەکی» بەشداریی پرۆسەکە دەکات.
پێشبینی دەکرێت لەم چوارچێوەیەدا، ئۆجالان دەستەیەکی تایبەت بە خۆی پێکبهێنێت کە سیاسەتمەدار و ڕاوێژکارانی کورد تێیدا ئەندام دەبن، و ئەم پێکهاتەیە ئەرکی بەڕێوەبردنی کارەکانی چەکداماڵین و کاری سیاسی لە ئەستۆ بگرێت.
لە لایەکی دیکەوە، پێشبینی دەکرێت کارەکانی تایبەت بە پرۆسەی ئاشتی تا کاتی بەڕێوەچوونی کۆبوونەوەی داهاتووی ئەنجومەنی ئاسایشی نەتەوەیی تورکیا بەردەوام بن، و دواتر لەو ئەنجومەنەدا بڕیارێکی کاتی یان مۆڵەتێک بدرێت بۆ ئەوەی بۆ بڕیاری کۆتایی هەنگاو بنرێت.