ژمارەیەکی زۆر لە هاووڵاتییانی ئامەد و شرنەخ لە باکووری کوردستان لە ڕێگەی خۆپیشاندان و چالاکیی جۆراوجۆرەوە داوایان کرد مافی خوێندن بە زمانی کوردی لە هەموو قۆناغەکانی خوێندنەوە دابین بکرێت.
بە بەشداریی نوێنەرانی پارت و لایەنە سیاسییەکان و ڕێکخراوەکانی کۆمەڵگەی مەدەنی لەوانەش کۆمەڵەی لێکۆڵینەوەی زمان و چاندەکانی مێزۆپۆتامیا -، هاووڵاتییانی باکووری کوردستان ڕێپێوان و خۆپیشاندانیان ئەنجام دا و جەختیان لەوە کردەوە کە مافی زمانی دایک مافێکی بنەڕەتی و گەردوونییە و نابێت بێتە بابەتی دانوستان و ئاڵۆزییەکان.
بەشداربووان لە خۆپیشاندانەکاندا ئاماژەیان بەوە دا کە وانە هەڵبژێردراوەکان بەس نین و داوایان کرد زمانی کوردی لە قوتابخانەی سەرەتاییەوە تاوەکوو زانکۆ ببێتە زمانی پەروەردە و خوێندن.
هەروەها جەختیان لەوەش کردەوە کە بۆ گەیشتن بە ئاشتی و چارەسەرییەکی دیموکراتیک، دەبێت ستاتۆی زمانی کوردی لە دەستوور و یاسای بنەڕەتیدا جێگەی بێتەوە.