بە تۆمەتی گەندەڵی و خراپبەکارهێنانی پۆست بۆ دەوڵەمەندبوونی نایاسایی، دادگەی کەرخ و وەزارەتی دارایی عێراق بڕیاری دەستبەسەرداگرتنی موڵک و ماڵ و سامانی ١٢ کەسایەتیی سیاسیی بڵاو کردەوە، کە ١١ کەسیان پەرلەمانتاری پێشوون و یەکێکیشیان ڕاوێژکاری سەرۆکوەزیرانی پێشووی عێراقە.
بەپێی بەڵگەنەمەیەکی بانکی ناوەندیی عێراق، داوا لە سەرجەم بانکە حوکومی و تایبەتەکان کراوە کە دەستبەجێ هەژماری بانکی و پشکەکانی ئەو کەسانە بلۆک بکەن و ڕێگری لە هەر جۆرە مامەڵەیەکی داراییان بکەن.
هاوکات بانکی ناوەندی داوای لە وەزارەتەکانی بازرگانی، پیشەسازی، کشتوکاڵ، فەرمانگەی تۆماری خانووبەرە، بەڕێوەبەرایەتیی هاتوچۆ و دەسەڵاتی باج کردووە ڕێکاری پێویست بگرنە بەر بۆ دەستبەسەرداگرتنی موڵک و سامانی نەگوێزراوە و گواستراوەیان.
ئەم بڕیارە لە کاتێکدایە کە سەرجەم ئەو کەسانە لە چوارچێوەی هەڵمەتە بەردەوامەکانی حکومەت بۆ رووبەڕووبوونەوەی گەندەڵی دەستگیر کراون و لێکۆڵینەوە لە دۆسیەکانیان بەردەوامە.