وەزارەتی دەرەوەی ئۆکرانیا بە فەرمی ئەو تۆمەتانەی حکومەتی عێراقی ڕەتکردەوە کە گوایە ژمارەیەک گرووپی چەکداریی ئۆکرانی لە عێراق کاری نایاسایی و چەکدارییان ئه‌نجامداوه. کێڤ جەخت دەکاتەوە کە ئەم لێدوانانە بێ‌بەڵگەن و زیان بە پەیوەندییە دووقۆڵییەکان دەگەیێنن.
وەزارەتی دەرەوەی ئۆکرانیا ڕایگەیاند، لێدوانەکەی قاسم عەبوودی، ڕاوێژکاری ئاسایشی نیشتمانیی عێراق لەبارەی ئەوەی ژمارەیەک گرووپی چەکداریی ئۆکرانی لە خاک و سنوورەکانی عێراقدا چالاکیی چەکداری و کاری نایاساییان ئەنجامداوە، سەرلەبەری دوورە لە ڕاستییەوە و "هەڵبەستراوە".
کێڤ ئاماژەی بەوەش کردووە کە ئەگەر عێراق زانیاریی لەو جۆرەی هەبووایە، دەبوو لە ڕێگەی کەناڵە دیپلۆماسییە فەرمییەکانەوە ئۆکرانیای لێ ئاگادار بکردایەتەوە، نەبوونی بەڵگەی سەلمێنراو و بڵاوکردنەوەی لە ڕێگەی میدیاکانەوە تەنیا زیان بە پەیوەندییەکانی نێوان بەغدا و کێڤ دەگەیێنێت.
ئەم وەڵامەی ئۆکرانیا دوای ئەوە هات کە ڕاوێژکاری ئاسایشی نیشتمانیی عێراق ڕایگەیاندبوو گرووپی چەکداریی ئۆکرانی لە ناو عێراقدا دەستیان لە کاری نایاسایی و چەکداریدا هەبووە.