مەسعود پزیشکیان، سەرۆک کۆماری ئێران ڕایگەیاند، قۆناغی ئێستا باشترین دەرفەتە بۆ بەدەستهێنانی ڕێککەوتن، یەکڕیزی و بەهێزی لە ناوخۆی وڵاتدا هەیە و دەکرێت ئەم بارودۆخە بکرێتە دەرفەتێک بۆ چارەسەرکردنی کێشەکان لە ڕێگەی گفتوگۆوە.
سەرۆک کۆماری ئێران جەختی لەوە کردەوە کە وڵاتەکەی هەوڵ دەدات فشارەکان لەسەر گەلەکەی کەم بکاتەوە و گوتی: "لە سایەی دۆخی نە جەنگ و نە ئاشتیدا، ڕەوشی ئابووری و بەرزبوونەوەی نرخەکان لە سەرووی تەواوی نیگەرانییەکانمەوەن".
مەسعود پزیشکیان ئاماژەی بەوەش کرد، کێشەکان تەنها بە جەنگ چارەسەر نابن و تاران بەپێی یاداشتی لێکگەیشتنەکان بەرەو ئاشتی هەنگاو دەنێت، بە مەرجێک لایەنی بەرانبەر ددان بە مافەکانی گەلی ئێراندا بنێت و جێبەجێیان بکات.
سەرۆک کۆماری ئێران جەختیشی کردەوە، بە گوێرەی پێشڕەوییەکانی لایەنی بەرانبەر لە دانوستانەکان دەچنە پێشەوە و ئەگەر هیچ پێشکەوتنێک پێشان نەدەن، داواکارییەکانیان قبووڵ ناکەن.
مەسعود پزیشکیان: قۆناغی ئێستا باشترین دەرفەتە بۆ بەدەستهێنانی ڕێککەوتن
