چوارچێوەی هەماهەنگیی شیعەکان پشتیوانی لە ئەنجامی سەردانەکەی زەیدی بۆ ئەمریکا دەکات

شەوی ڕابردوو هاوپەیمانیی چوارچێوەی هەماهەنگیی شیعەکان بە ئاماده‌بوونی عەلی زەیدی، سەرۆکوەزیرانی عێراق کۆبووەوە.

لە دانیشتنەکەدا ئەنجامی سەردانەکەی سەرۆکوەزیرانی عێراق بۆ ویلایەتە یەکگرتووەکانی ئەمریکا، ناوەرۆکی چاوپێکەوتنەکان و یاداشتی لێکتێگەیشتن و ڕێککەوتنە ئیمزاکراوەکان لە بوارە جیاوازەکاندا خرانەڕوو.

چوارچێوەی هەماهەنگی لە ڕاگەیاندراوێکدا پشتیوانیی تەواوی بۆ ڕێککەوتن و لێکتێگەیشتنەکانی سەرۆکوەزیران لەگەڵ ئەمریکا ڕاگەیاند و ئاماژەی بەوە کرد، ئەم هەنگاوە دەبێتە هۆی بەهێزکردنی پێگەی هەرێمایەتی و نێودەوڵەتیی عێراق، ڕاکێشانی سەرمایەگوزاریی دەرەکی و دابینکردنی هەلی کاری نوێ.

هاوپەیمانییەکە پشتیوانیی خۆی بۆ رێکارەکانی حکومەت دووپات کردەوە لە بەرامبەر ڕووبەڕووبوونەوەی گەندەڵی، دەستگیرکردنی تۆمەتباران، سەروەربوونی یاسا و گەڕاندنەوەی سەرمایە دزراوەکان بۆ خەزێنەی دەوڵەت و جەختی لەسەر بەهێزکردنی سەقامگیریی سیاسی و ئاسایشی گشتی لە وڵاتدا کردەوە.