ئەمڕۆ دووشەممە، 21ی ئەیلولی 2026، پەرلەمانی عێراق لە کۆبوونەوەی ئاساییی خۆیدا پاکێجێکی 12 خاڵی لە راسپاردەکان بە زۆرینەی دەنگ پەسند کرد و ئاراستەی ئەنجوومەنی وەزیرانی کرد، بە مەبەستی ڕووبەڕووبوونەوەی کێشەی کەمیی بەرهەمە نەوتییەکان و دابەزاندنی نرخی بەنزین لە عێراق و هەرێمی کوردستان.
لە گرنگترین خاڵەکانی راسپاردەکەدا داوا کراوە پێداچوونەوە بە بڕی نەوتی خاوی تەرخانکراو بۆ هەرێمی کوردستان بکرێت و پەلە لە دابینکردنی نەوتی ماڵان بۆ وەرزی زستان بکرێت بە هەمان شێوازی پارێزگاکانی دیکەی عێراق.
پەرلەمانی عێراق داوای لە حکومەت کردووە چاو بە بڕیاری بەرزکردنەوەی نرخی بەرهەمە نەوتییەکاندا بخشێنێتەوە و خشتەیەکی کاتی دابنێت بۆ گەیشتن بە خۆبژێوی لە بەرهەمهێناندا، لە کاتێکدا عێراق ڕۆژانە پێویستی بە 35 ملیۆن لیتر بەنزین هەیە و دووچاری 5 ملیۆن لیتر کورتهێنان دەبێتەوە.
هاوکات جەخت لەسەر تووندکردنی چاودێری لە کۆگەکان تا وێستگەکان، ڕێگری لە بەهەدەردان و تاوتوێکردنی نموونەی ئابووریی فرۆشتنی ناوخۆییی نەوت لەگەڵ لیژنەی نەوت و گازی پەرلەمان کراوەتەوە تاوەکو بەر لە جێبەجێکردنی بگەنە ڕێککەوتن.
پەرلەمانی عێراق 12 راسپاردەی بۆ چارەسەرکردنی قەیرانی سووتەمەنی و دابینکردنی نەوتی ماڵان لە هەرێمی کوردستان پەسند کرد
