بڵاوبوونەوەی گرتەیەکی ڤیدیۆیی ڕەفیق ساڵحی، پەرلەمانتاری فراکسیۆنی سادیقوونی باڵی سیاسیی عەسائیبی ئەهلی حەق لە تۆڕە کۆمەڵایەتییەکاندا دەنگدانەوە و ناڕەزایەتییەکی بەرفراوانی لەسەر ئاستی شەقامی عێراقی لێکەوتەوە.
دوای ئەوەی ڕەفیق ساڵحی بە زۆر دەچێتە سەر کورسیی بەڕێوەبەری گشتی لە کۆمپانیایەکی سەر بە وەزارەتی پیشەسازی و کانزاکان و مامەڵەیەکی توند لەگەڵ بریکاری وەزارەت دەکات.
لە گرتە ڤیدیۆییەکەدا دەردەکەوێت لە کاتی سەردانیکردنی بۆ کۆمپانیاکە بە بیانووی بەدواداچوون بۆ کێشەیەک، ساڵحی لەسەر کورسیی بەڕێوەبەری گشتی دادەنیشێت و لە وەڵامی ناڕەزایەتیی ناسڕ کازم جەبر، بریکاری کارگێڕیی وەزارەتەکە پێی دەڵێت: "ئەگەر بە دڵت نییە، فەرموو دەرگات لێ کراوەیە و بڕۆ دەرەوە". هەروەها داوای ئامادەبوونی دەستبەجێی بەڕێوەبەری گشتی و ئەندامانی ئەنجومەنی کارگێڕیی کۆمپانیاکە دەکات.
ئەم هەڵسوکەوتەی پەرلەمانتارەکە وەک دەستوەردانی ڕاستەوخۆ لە کاروباری جێبەجێکردن و سووکایەتیکردن بە بەرپرسانی دەوڵەت لەناو دامەزراوە فەرمییەکاندا سەیر کراوە، لە کاتێکدا بە گوێرەی دەستوور ڕۆڵی پەرلەمانتار تەنیا چاودێریکردن و یاسادانانە.
دەستوەردانی پەرلەمانتارێکی عەسائیب لە وەزارەتی پیشەسازی ناڕەزایەتی لێ دەکەوێتەوە
