بەڕێوەبەری گشتیی سەرچاوە سروشتییەکانی پارێزگای سنە ڕایگەیاند، بە گوێرەی پێوەرە جیهانییەکان پێویستە بۆ هەر چوار هەزار هێکتار لە لەوەڕگا و دارستانەکان پاسەوانێک هەبێت، بەڵام لە پارێزگای سنە تەنها 80 هێزی پاراستنی ژینگە هەن، کە دەبێت ڕووبەرێکی زۆر فراوان بپارێزن.
بێهزاد شەریفی ئاماژەی بەوەدا، کەمبوونی هێزی مرۆیی و کەرەستەش بووەتە ئاستەنگێکی گەورە لە بەرانبەر پاراستنی سەرچاوە سروشتییەکان، لە کاتێکدا پاسەوانان لە هێڵی پێشەوەی ڕووبەڕووبوونەوەی ئاگرکەوتنەوە و بڕینەوەی دارستانەکانن.
جەختی لەوەشکردەوە، پاراستنی دارستانەکان بێ بەشداریی خەڵک مەحاڵە و پێویستە خەڵکی ناوچەکان بە هەموو شێوەیەک پارێزگاری لە ژینگە و دارستانی خۆیان بکەن.
گوتیشی، بە گوێرەی ئامارەکان، لە کۆی ڕووبەری پارێزگای سنە، ملیۆنێک و ٥٨٧ هەزار هێکتاری لە لەوەڕگا و دارستان پێکهاتووە و ناوچەکە پێویستی بە 400 پاسەوانی دارستان هەیە.