موقتەدا سەدر هۆشداری دەداتە بازرگانان لەبارەی گرانفرۆشی و فێڵکردن

موقتەدا سەدر، ڕێبەری ڕەوتی نیشتمانیی شیعە، لە گوتاری نوێژی هەینیدا، کە لە 18ی ئەیلولی 2026 لە سەرتاسەری عێراق خوێندرایەوە، داوای لە بازرگانان کرد پابەندی سپاردە و ڕەوشتی بازرگانی بن و وشیاریی دان لە گرانفرۆشی، فێڵکردن، سوودخۆری و ساختەکاری.

موقتەدا سەدر جەختی لەوە کردەوە، ئازادی بە مانای پشێوی نایەت و پێویستە دەستبەرداری سەرپێچییە شەرعییەکان لە بازاڕەکاندا بن چونکە دەبێتە هۆی تووڕەییی ئاسمانی. هەروەها هەڕەشەی ئەوەی کرد، ئەگەر حکومەتی خۆجێیی بەتایبەت لە نەجەف ڕێگری لەو سەرپێچییانە نەکات، ئەوان بێدەنگ نابن و بەشێک دەبێت لە پرۆسەی چاکسازییەکانیان، گوتیشی هەر کەسێک ڕێز لە نەجەف نەگرێت، ئەوانیش ڕێزی ناگرن.

لە کۆتایی گوتارەکەیدا، ڕێبەری ڕەوتی نیشتمانیی شیعە داوای لە بازرگانان کرد شارەزای فیقهی بازرگانی بن و ئەوانەشی پابەند نین تۆبە بکەن، جەختیشی کردەوە کە لە نزیکەوە چاودێریی ڕەفتاری بازرگانان و بازاڕەکان دەکەن.