ئەنجومەنی پیشەیی مامۆستایانی سنە داوا دەکات قوتابیانی کورد مافی خوێندنیان بە زمانی دایکی خۆیان هەبێت.
لەگەڵ نزیکبوونەوەی دەستپێکردنی ساڵی نوێی خوێندن لە ڕۆژهەڵاتی کوردستان، ئەنجومەنی پیشەیی مامۆستایانی پارێزگای سنە راگەیەنراوێکی لەبارەی دۆخی پەروەردە لە پارێزگاکە بڵاوکردەوە و داوای خوێندن بە زمانی دایک و کۆتاییهێنان بە مامەڵەی ئەمنی و کارگێڕی لەگەڵ مامۆستایان دەکات.
ئەنجومەنەکە دەشڵێت، قوتابخانەکانی سنە پێویستیان بە نزیکەی دوو هەزار و 740 مامۆستای دیکە هەیە و پۆلەکانیش زۆر قەرەباڵغن.
ئەنجومەنی پیشەیی مامۆستایان لە کۆتایی راگەیەنراوەکەیدا نیگەرانی دەربڕیوە سەبارەت بە بەرزبوونەوەی تێچووی خوێندن و نەبوونی پێداویستییەکانی تەندروستی و پەروەردەیی لە ژمارەیەکی بەرچاو لە قوتابخانەکانی پارێزگاکە.