لە وەڵامی هێرشە هاوبەشەکەی ئەمریکا و عەرەبستانی سعودی بۆ سەر پێگەکانی حەشدی شەعبی، ئەنجوومەنی ئاسایشی نیشتمانیی عێراق کۆبوونەوەیەکی نائاسایی بە سەرۆکایەتیی فەرماندەی گشتیی هێزە چەکدارەکان ئەنجام دا و جەختی لەوە کردەوە کە پاراستنی سەروەریی وڵات تەنیا لە دەسەڵاتی دەوڵەتدا دایە.
بەپێی ڕاگەیەندراوی کۆبوونەوەکە، هێرشەکان لە کاتێکدا ئەنجام دراون کە حکومەت لە پەیوەندیدا بووە بۆ چارەسەرکردنی ئەو نیگەرانییانەی واشنتن و ریاض سەبارەت بە خاکی سعودیە ورووژاندبوویان. ئەنجوومەنەکە چەند بڕیار و هەڵوێستێکی خستە ڕوو:
پلانی ئەمنی: پەسەندکردنی پلانێکی تەواو بۆ بەرەنگاربوونەوەی پێشێلکارییەکانی سەروەریی عێراق و ڕێگریکردن لە هەر هەڕەشەیەک دژی وڵاتانی دراوسێ.
کاری دیپلۆماسی: ڕاسپاردنی وەزارەتی دەرەوە بۆ گرتنەبەری ڕێکاری یاسایی لەسەر ئاستی نێودەوڵەتی و نەتەوە یەکگرتووەکان بۆ دۆکیۆمێنتکردنی دۆخەکە و سەلماندنی مافی عێراق.
تەنیا بڕیاری دەوڵەت: جەختکردنەوە لەوەی کە مامەڵەکردن لەگەڵ دۆخەکەدا تەنیا لە ئەستۆی حکومەت و دامەزراوە فەرمییەکاندایە بەپێی دەستوور، و هەموو هەوڵێکی تاکلایەنەی بێ پاساو رەت کرایەوە.
دۆسیەی ئەمنی و سەربازی: دووپاتکردنەوە لەسەر جێبەجێکردنی رێککەوتنی ئەمنی بۆ کشانەوەی هێزەکانی هاوپەیمانان لە کۆتایی ئەیلولی ٢٠٢٦ و تەواوکردنی پرۆسەی کۆکردنەوەی چەک تەنیا لە دەستی دەوڵەتدا.