دادگای تاوانەکانی بەرەنگاربوونەوەی گەندەڵی سزای حەوت ساڵ زیندانیکردنی بۆ عەلاء سەمیر ڕاشد، بەڕێوەبەری گشتیی کۆمپانیای دابەشکردنی کارەبای ناوەڕاست دەرکرد و پابەندیشی کرد بە گەڕاندنەوەی زیاتر لە 25.7 ملیار دینار بۆ خەزێنەی دەوڵەت.
دەستەی دەستپاکی ڕایگەیاند، بڕیاری دادگا بەپێی ماددەی 19/دووەم لە یاسای دەستەی دەستپاکی و دەستکەوتی ناڕەوا (ژمارە 30ی ساڵی 2011ی هەموارکراو) دەرچووە. بەپێی بڕیارەکە، سزادراوەکە دەبێت بڕی پێنج ملیار و 524 ملیۆن دینار و پێنج ملیۆن و 538 هەزار دۆلاری ئەمریکی بگەڕێنێتەوە، لەگەڵ سەپاندنی سزایەکی دارایی بەرامبەر بە هەمان بڕ کە کۆی گشتیی هەردووکیان دەکاتە 25.7 ملیار دینار.
هاوکات بڕیاری دادگا دەستبەسەرداگرتنی گشت موڵکە گواستراوە و نەگواستراوەکانی سزادراوەکەی پشتڕاست کردووەتەوە و مافی بە دەستەی دەستپاکی داوە دوای یەکلا بوونەوەی کۆتایی بڕیارەکە، داوای قەرەبووکردنەوە لە زیانەکان بکات.
سزادانی بەرپرسێکی کارەبای ناوەڕاست بە حەوت ساڵ زیندانیکردن و گەڕاندنەوەی 25.7 ملیار دینار
