سەرۆکی ئەنجومەنی باڵای دادوەریی عێراق، فایەق زێدان، لە پەیامێکدا بە بۆنەی کشانەوەی هێزەکانی هاوپەیمانان و ٣٠ی ئەیلوول، کە وەک "ڕۆژی سەروەریی نیشتمانی" دیاری کراوە، جەخت لەسەر سەربەخۆیی بڕیاری سیاسی و یاسایی وڵات دەكاتەوە.
لە پەیامەکەیدا، سەرۆکی ئەنجومەنی باڵای دادوەری ڕایگەیاند کە ئەم بۆنەیە وێستگەیەکی نیشتمانیی ئیلهامبەخشە لە ڕێڕەوی چەسپاندنی سەروەریی تەواوی دەوڵەت و سەربەخۆیی بڕیاری نیشتمانی، هیوای خواست کشانەوەی هێزەکانی هاوپەیمانان فاکتەرێک بێت بۆ قایمترکردنی پێگەی دەوڵەت.
هاوکات، فایەق زێدان جەخت لە گرنگیی پابەندبوونی تەواو بە ڕێزگرتن لە دەستوور و سەروەریی یاسا کردەوە، وەک بنەمایەکی سەرەکی بۆ پاراستنی ماف و ئازادییە گشتییەکان و مسۆگەرکردنی بەرژەوەندییە باڵاکانی دەوڵەت و کۆمەڵگە.