ئەنجومەنی نوێنەرانی عێراق لە دانیشتنی دوێنێیدا ڕاپۆرتی ساڵی 2025ی دیوانی چاودێریی دارایی تاوتوێ کرد و ڕایگەیاند، ڕاپۆرتەکە لە خوار ئاستی چاوەڕوانییەکانەوەیە و نەکەوتووەتە ئاستی بەرپرسیاریەتی.
لەم چوارچێوەیەدا سەرۆکایەتیی پەرلەمان داوای کرد دیوانی چاودێریی دارایی بە شێوەیەکی ورد و زانستی قەبارەی تەواوی پارەی بەفیڕۆدراو لە دامەزراوەکانی دەوڵەتدا دیاری بکات.
لە دانیشتنەکەدا، پەرلەمانتاران داوایان کرد لێکۆڵینەوەی بەپەلە و گشتگیر لە دۆسیە داراییەکانی پاڵاوگەی بێجی، کۆمپانیای نیشتمانیی بەبازاڕکردنی نەوت (سۆمۆ) و بودجەی تەرخانکراو بۆ کەرتی کارەبا بكرێت.
دوابەدوای گفتوگۆکان، بڕیار درا دانیشتنەکە بۆ ڕۆژی پێنجشەممەی داهاتوو هەڵبگیرێت تاوەکو ستافی تەکنیکیی دیوانی چاودێریی دارایی ئامادە ببن و وەڵامی ڕاستەوخۆی پرسیار و تێبینییەکانی یاسادانەران بدەنەوە.
پەرلەمانی عێراق ڕاپۆرتی ساڵی 2025ی دیوانی چاودێریی دارایی ڕەت دەکاتەوە
