عەلی زەیدی، سەرۆکوەزیرانی عێراق، لە شاری بەغدا پێشوازی لە نەواف سەلام، سەرۆکوەزیرانی لوبنان و شاندی یاوەری کرد و کۆبوونەوەیەکی دووقۆڵییان ئەنجامدا.
بەگوێرەی ڕاگەیەندراوی نووسینگەی ڕاگەیاندنی سەرۆکوەزیرانی عێراق، لە کۆبوونەوەکەدا پەیوەندییە دووقۆڵییەکانی نێوان هەردوو وڵات، هاوبەشیی ئابووری و دواین پێشهات و بارودۆخی ناوچەکە تاوتوێ کران.
ئەم سەردانە لە کاتێکدایە کە لەناوچەکەدا گفتوگۆی چڕ لەسەر بابەتەکانی ئینەرجی و هێڵەکانی گواستنەوە هەیە.
هاوکات وەک هەوڵێکی لوبنان دەبینرێت بۆ بەهێزکردنی هاوکارییە ئابوورییەکانی لەگەڵ عێراق، سووریا و تورکیا و پتەوکردنی پەیوەندییەکانی لەگەڵ وڵاتانی عەرەبی.
لە شاندی هاوڕێی سەرۆکوەزیرانی لوبناندا چەندین بەرپرسی باڵا بەشدارن، لەوانە: یاسین جابر (وەزیری دارایی)، جۆ ئەلسەعدی (وەزیری ئینەرجی) و لیوا حەسەن شاکر (بەڕێوەبەری ئاسایشی گشتی).