ئەنجومەنی باڵای دادوەریی عێراق ڕایگەیاند، لە چوارچێوەی لێکۆڵینەوەکانی پەیوەست بە دۆسیەی گەندەڵیی عەدنان جومەیلی، بریکاری وەزارەتی نەوتی عێراق، لە پارێزگای سەلاحەددین دەست بەسەر بڕێکی زۆر پارەی کاش و زێڕدا گیراوە.
لە ڕاگەیەندراوێکدا، دادوەر زیا جەعفەر وردەکاریی دۆسیەکەی بۆ رای گشتی ئاشکرا کرد و ڕایگەیاند، لە ئەنجامی پشکنینی چەند شوێنێکی جیاوازی تۆمەتبار عەدنان جومەیلی لە پارێزگای سەلاحەددین، لە ناو شوێنی حەشارگەی تایبەتدا دەست بەسەر 13 ملیار دیناری عێراقی و 400 هزار دۆلاری ئەمریکیدا گیراوە.
دادوەر زیا جەعفەر ئاماژەی بەوەش دا، جگە لە پارە کاشەکە، لە پشکنینەکاندا 40 کیلۆگرام زێڕی خاو و 5 کیلۆگرام زێڕی دروستکراو (زیوەر) دۆزراونەتەوە و دەستیان بەسەردا گیراوە.
سەرۆکی دادگای لێکۆڵینەوە جەختی لەسەر بەردەوامیی بەرەنگاربوونەوەی تاوانە ئابوورییەکان کردەوە و ڕایگەیاند، بەدواداچوون بۆ ئەو کۆمپانیایانەش بەردەوامە کە بە شێوازی نایاسایی دراویان بۆ دەرەوەی وڵات ڕەوانە کردووە؛ لەو چوارچێوەیەشدا توانراوە ملیارێک و 143 ملیۆن و 847 هزار و 719 دیناری عێراقی بۆ گەنجینەی دەوڵەت بگەڕێندرێتەوە.
ئەنجومەنی باڵای دادوەری ئاماژەی بەوەش کردووە، لێکۆڵینەوەکان لە دۆسیەی عەدنان جومەیلی بە مەبەستی بەدواداچوونی سەرچاوەی داهاتە نایاساییەکان و دەستنیشانکردنی تەواوی ئەو کەسانەی تێوەگلاون، بە فراوانی بەردەوامن.