لە مەراسیمی کۆتاییهاتنی ئەرکی سەربازیی هاوپەیمانیی نێودەوڵەتی لە عێراق، عەلی زەیدی، سەرۆکوەزیرانی عێراق گوتارێکی پێشکەش کرد و ڕایگەیاند کە قۆناغێکی نوێ لە وڵاتدا دەستی پێکردووە.
عەلی زەیدی هۆشداریی دا کە سەرباری بەڕێکردنی هێزە نێودەوڵەتییەکان، شەڕی دژی تیرۆر لە عێراق هێشتا کۆتایی نەهاتووە و ئەرکی پاراستنی ئاسایش لەسەر شانی دامەزراوە نیشتمانییەکان بەردەوام دەبێت.
سەرۆکوەزیرانی عێراق جەختی لەسەر سەروەریی یاسا کردەوە و بە بڕیارێکی بێگەڕانەوەی ناو برد کە نابێت هیچ چەک و هێزێک لە دەرەوەی دەسەڵات و چوارچێوەی دەزگاکانی دەوڵەتدا هەبێت.
ئەم هەڵوێستەی سەرۆکوەزیران هاوکات بوو لەگەڵ ڕاگەیاندنی فەرمیی کشانەوەی تەواوەتیی سوپای ئەمریکا و هاوپەیمانیی نێودەوڵەتی لە خاکی عێراق و هەرێمی کوردستان لە ڕۆژی چوارشەممەدا، کە کۆتایی بە ئەرکێکی سەربازیی 12 ساڵەی ڕووبەڕووبوونەوەی داعش هێنا کە لە ساڵی 2014ەوە لەسەر داوای بەغدا دەستی پێکردبوو.
سەرۆکوەزیرانی عێراق: نابێت چەک لە دەرەوەی هێزی دەوڵەت بێت
