لە کاردانەوەی هێرشە ئاسمانییەکانی بەیانیی ئەمڕۆ بۆ سەر بارەگاکانی حەشدی شەعبی لە هەشت پارێزگای عێراقدا، هادی عامری، ئەمینداری گشتیی ڕێکخراوی بەدر ڕاگەیەندراوێکی بڵاوکردەوە و تێیدا توندی سەرکۆنەی ئەو پەلامارانەی کرد و بە دەستدرێژیی ناڕەوا بۆ سەر سەروەریی عێراق ناوی بردن.
هادی عامری ئاماژەی بەوە دا، ئەم هێرشەی سعودیە بە پشتیوانیی فڕۆکە جەنگییەکانی ئەمریکا زیانی گیانی و مادیی گەورەی بە هێزەکانی حەشدی شەعبی و بەتایبەتی هێزەکانی ڕێکخراوی بەدر گەیاندووە.
سکرتێری گشتیی ڕێکخراوی بەدر ڕەخنەی توندی لە هەڵوێستی سعودیە گرت و ڕایگەیاند، عێراقییەکان سەرسام بوون بەم هەنگاوەی وڵاتێکی دراوسێ، هاوکات سعودیەی تۆمەتبار کرد بەوەی هەمیشە هەوڵی هەڵگیرساندنی فیتنە و بچووککردنەوەی ڕۆڵی عێراقی داوە.
هادی عامری جەختی کردەوە، ئەم ڕەفتارە دوژمنکارانەیە پێویستی بە هەڵوێستێکی توندی حکومەت هەیە و داوای کرد پێداچوونەوەی گشتگیر بۆ سەرجەم ڕێککەوتننامەکان لەگەڵ ئەمریکا بکرێت، لە پێش هەموویانەوە ڕێککەوتنی ئەمنی، تاوەکو سەروەری و شکۆی عێراق بپارێزرێت.
هادی عامری داوای هەڵوەشانەوەی ڕێککەوتنی ئەمنی لەگەڵ ئەمریکا دەکات
