Serokê Giştî yê CHP’ê Ozgur Ozel li Lijneya Giştî ya Parlamentoya Tirkiyê di dema gotûbêjên budceya 2026'an de axivî.
Ozel di axaftina xwe de behsa pêvajoya çareseriyê û rewşa Kurdên Rojavayê Kurdistanê kir.
Ozel diyar kir ku ew dê di çarçoveya pêvajoyê de bi biryardarî bixebitin û piştgiriya xwe ya ji bo Komîsyona Parlamentoya Tirkiyeyê bidomînin.
"Em biratî û aştiya Tirk û Kurdan diparêzin"
Serokê CHP'ê anî zimên ku ew dê hewl bidin hêviya aştiyê nebe qurbana berjewendiyên hinekan û dibêje:
“Em wekî CHP'yê li dijî qeyûman derdikevin, em dixwazin biryarên Dadgeha Mafên Mirovan a Ewropayê werin bicihanîn. Bila biryarên Dadgeha Destûra Bingehîn werin bicihanîn. Em li Tirkiyê biratî û aştiya Tirk û Kurdan diparêzin.”
"Em dixwazin Kurd bibin xwedî garantiya destûrî"
Ozgur Ozel di axaftina xwe de bal kişand ser rewşa Sûriye û Rojavayê Kurdistanê jî û anî ziman ku ew dixwazin hemû pêkhateyên li wî welatî bibin xwedî garantiya destûrî.
Ozel wiha got, “Em dixwazin Kurd, Ereb, Durzî û Tirkmenên li Sûriyê bibin xwedî garantiya destûrî.
Hebûna demokratîk, aştî û aramiya Kurdên Sûriyê ji bo Tirkiyê garantiyeke mezin e. Em dixwazin li ser sînorê xwe bi birayên xwe re cîrantiyeke birayane bikin.”
