Ev 11 roj in komên çekdar ên girêdayî hikûmeta demkî ya veguhêz a Sûriyeyê û çekdarên eşîrên bedewî tevî agirbestê jî êrîşên xwe yên li ser Siweydayê dewam dikin. Di van êrîşan de bi sadan sivîl hatin kuştin û herî zêde jin rastî kiryarên hovan e, destdirêjî, revandin û tundiya zayendî hatin.
Destdirêjî, komkujiyên li Siweyda û Peravên Sûriyê heman kiryarên li Efrîn, Girê Spî û Serê Kaniyê tînin bîra mirovan.
Eşekere ye ku li Sûriyê heman senariyo xwe dubare dike. Ev senaryo bi destê komên çete yên ku destdirêjî û kuştina jinan bi hestên mezhebperestiyê ji xwe re rewa dibînin pêk tê.
Bedriye Îbrahîm a 40 salî yek ji wan jinan e ku ji bajarê xwe koçber bûye û rastî êrîş û talanên çeteyan hatiye.
Di dema şerê Serê Kaniyê de 2 zarokên wê jî şehîd bûn.
Koçbera Serê Kaniyê jineke ku bi vîna xwe karîbû heya vê kêliyê bi êş û zehmetiyan li dibistaneke koçberan bimîne.
“Jin li Sûriyeyê rastî kuştin û destdirêjiyê tên”
Bedriye Îbrahîm diyar dike ku Komkujiyên li Sûriyeyê pêk tên çi li serê Kurdan be, yan Elewiyan be û herî dawî jî li ser Duriziyan weke kiriyarên hov û bê mirovî tê nasîn.
Koçbera Serê Kaniyê bi bîr dixe ku çeteyên bi navê xwedê bang dikin, li gelek bajarên Sûriyê kuştin û destdirêjiyê li ser jinan dikin. Ji dema dagirkirina Efrînê de bigire û heya niha heman kiriyarê li Siweydeyê jî pêk tînin.
“Li Sûriyeyê mirov ji ber cudahiyên netewî û bawariyê tên kuştin”
Bedriye Îbrahîm destnîşan dike ku li Sûriyê mirov ji ber ku kurd e, Elewî ye û Durzî ye an jî ji rêoleke din e tê kuştin.
Her wiha balê dikşîne li ser kiryarên li hember jinan û dibêje: “Mafê jinê û parastina wê jî her roj tê binpêkirin, jin rastî kuştin, îşkenceyê û destdirêjiyê tên.”