Duh êvarê, şandeya Yekîtiya Niştimanî ya Kurdistanê (YNK), bi seroketiya Endamê Polîtburoyê, Qubad Talebanî gihaşt Bexdayê.
Şandeyê serdana Serokê Encûmena Bilind a Dadwerî ya Îraqê Fayiq Zêdan kir.
Ofîsa Qubad Talebanî destnîşan kir ku bi vegera li destûrê, beşeke mezin ji pirsgirêkên di navbera Hewlêr û Bexdayê de, wê çareser bibe.
Talebanî: Divê budceya Kurdistanê parastî be
Ofîsa Talebanî tekez kir ku divê pirsgirêka budceyê were çareserkirin û nabe êdî bi ti awayî, budce wekî mafekî destûrî yê xelkê Kurdistanê bikeve nav nakokiyên siyasî.
Şande bi sekreterê Giştî yê Rêxistina Bedrê, Hadî Amirî re civiya û herdu aliyan behsa kûrahiya pêwendiyên stratejîk û dîrokî yên di navbera Rêxistina Bedr û YNK`ê de kir.
Qubad Talebanî bi Emîndarê Giştî yê Tevgera Esaîb Ehlî Heq, Qeys Xezelî re jî civiya.
Talebanî got:" YNK Bexdayê wekî kûrahiya stratejîk dibîne û divê pirsgirêk li gorî destûrê werin çareserkirin."
Divê hikûmet serwerî û serxwebûna Îraqê biparêze û ji bo pêşxistina aboriyê gavên bingehîn bavêje.
Qubad Talebanî wiha bedewam kir "Erkê hikûmeta bê ya Îraqê ye ku dûrî nakokiyên siyasî, para budce û mûçeyê Herêma Kurdistanê dabîn bike."
Şandeya YNK'ê bi serokwezîrê Îraqê re civiya
Şandeya YNKê bi Serokwezîrê Îraqê Mihemed Şiya Sûdanî re civiya.
Herdu aliyan hilbijartinên Parlamentoya Îraqê wekî destkefteke girîng a demokrasiyê ji bo hemû gelê Îraqê bi nav kir."
Li Bexdayê daxwaza bicihkirina siyaseta Mam Celal hat kirin
Her wiha Şandeya YNK`ê bi Serokê Hevpeymaniya Dewleta Yasayê Nûrî Malîkî re jî, civiya.
Di civînê de, Nûrî Malîkî rol û pêgeha Celal Talebanî bi bîr anî û got:" ji bo çêkirina lihevkirinê û pêkanîna hikûmeta bê, divê heman siyaseta Mam Celal were bicihkirin."
