Salvegera yekemîn a damezrandina Însiyatîfa Yekîtiya Demokratîk

Însiyatîfa Yekîtiya Demokratîk, bi boneya salvegera yekemîn a damezrandina xwe, daxuyaniyek belav kir.

Di daxuyaniya de hat gotin:

“Di vê qonaxa dîrokî de, ji bo mayîndekirina destkeftiyan û statuya gelê Kurd, divê her kes di bin sîwana yekîtiyê de cih bigire.”

Daxuyaniyê, bal kişand ser avakirina Yekîtiyê ku di qonaxeke girîng de, bi beşdariya rêxistinên civaka sivîl, partiyên siyasî yên Kurdistanî, pêşeng û rûsipiyên gel, 11`ê Gulana 2025`an hat damezrandin.

Daxuyanî wiha domiya:

"Bi taybetî, yekîtiya me ya demokratîk di qonaxa ku li cîhanê guhertinên mezin diqewimin de, pêwistiyeke jiyanî ye.

Lewre di serî de li Rojhilata Navîn, li her çar aliyên cîhanê, şerên çekdarî û aborî didomin û xuya ye ku pergaleke nû ya cîhanî ji nû ve tê avakirin.

Ji aliyekî din ve, pirsgirêka Kurd jî wekî pirsgirêkeke herêmî roj bi roj xwe dide der.

Li hemberî van geşedanan, Înîsiyatîfa Yekîtiya Demokratîk, wekî bersiveke Kurdistanî dest bi kar kir."

"Civak li benda gavên berbiçav û diyarkirina statuya birêz Ocalan e"

Daxuyaniyê herwiha bal kişand ser pêvajoya aştiyê ya li Bakurê Kurdistanê û got:

"Înisiyatifa Yekitiya Demokratîk bi awayekî xurt piştgiriya pêvajoya Aştî û Civaka Demokratîk dike.

Lê divê were dîtin ku civak êdî li benda gavên berbiçav e û diyarkirina statuya birêz Abdullah Ocalan e."

"Werin di bin sîwana yekîtiya neteweyî de cihê xwe bigirin"

Însiyatîfa Yekîtiya Demokratîk di dawiyê de bang li hemû Kurdistaniyan kir ku di bin sîwana yekîtiyê de cih bigirin û wiha bi dawî kir:

"Banga me li hemû Kurdistaniyan e ku werin di bin sîwana yekitiyê de cihê xwe bigirin

Em soz didin ku em ê xebatên xwe yên yekîtiyê xurttir û berfirehtir bikin, da ku xwe bigihînin kongreya neteweyî ya Kurd."