Artêşa Rûsyayê berbanga sibeha îro êrîşeke berfireh a hewayî bir ser Kîev paytexta Ûkraynayê û herêma derdora wê. Li gorî daxuyaniyên fermî yên rayedarên Ûkraynayê, di vê êrîşê de ku bi mûşek û dronan hat kirin, zarokek hat kuştin û pênc kesên din jî birîndar bûn.
Parêzgarê Herêma Kîevê Tîmûr Tkatşenko ragihand ku li herêma derdora bajêr zarokek miriye û sê kes birîndar bûne. Di heman demê de, Şaredarê Kîevê Vitaliy Kliçko diyar kir ku di hundirê bajêr de jî du kes birîndar bûne û tîmên tenduristiyê destwerdan kirine.
Zirarên mezin gihîştin binesaziyê
Êrîşê tenê zirar neda canê mirovan, lê belê bû sedema hilweşîneke mezin a maddî jî. Li gelek deverên Kîevê agir bi avahiyan ket. Rayedarên herêmî ragihandin ku navendên binesaziyê, avahiyên niştecîhbûnê, depo, dikan û gelek wesayîtên sivîlan bi giranî zirar dîtine.
Daxuyaniya Rûsyayê: Me navendên leşkerî armanc girt
Li aliyê din, Wezareta Parastinê ya Rûsyayê derbarê êrîşê de daxuyaniyek belav kir. Rûsyayê îdîa kir ku êrîşên wan serkeftî bûne û wan navendeke ragihandinê ya girîng a li Kîevê û tesîsên enerjiyê yên ku piştgiriya hilberîna leşkerî ya Ûkraynayê dikin, kirine armanc.
Hêzên parastina hewayî ya ûkraynayê diyar kirin ku wan hejmarek mezin ji dron û mûşekên Rûsyayê li asmanê paytextê anîne xwarê, lê perçeyên wan bûn sedema zirarên canî û maddî.
