Endamê Konseya Serokatiyê ya Partiya Yekîtiya Demokratîk PYD'ê û hevserokê berê yê PYDyê Salih Muslim vê êvarê li Hewlêrê koça dawî kir.
Partiya Yekîtiya Demokrîtk bi daxuyaniyekê wefata siyasetmedar Salih Muslim li ser malpera xwe ragihand û sersaxî ji malbat û gelê Kurdistanê re xwest.
Daxuyaniya PYDê wiha ye:
''Salih Muslim bavê Welat, jiyana xwe ji bo xizmetkirina doza gelê xwe û parastina mafên wan ên rewa tekoşîn kir.
Bi salan xebatên siyasî û rêxistinî kir, ew beşdarî avakirina nirxên têkoşîn û azadiyê bûye.
Di dîroka partî û tevgera neteweyî ya Kurd de şopeke mezin hişt.
Navê wî dê di bîranîna hevalên xwe û gelê xwe de wekî mînakeke fedakarî, têkoşîn û fedakariyê ji bo doza ku ew pê bawer dikir bimîne.
Em weke Partiya Yekîtiya Demokratîk (PYD) sersaxiyê ji malbat, hevalên wî û hemû gelên Kurdistanê re dixwazin.
Koça dawî ya Salih Muslim windahiyeke mezin e, lê belê mîrata wî ya têkoşînê wê wekî çirayek rêber bimîne ku rêya berxwedana berdewam ronî bike.
Dema ku em ji vî kesayetiya bilind a têkoşînê xatir dixwazin, em soz didin gel û hevalên xwe ku em li ser rêya ku wî ya çêkiriye bidomînin û têkoşîna wî bidomînin heta ku em bigihîjin armancên ku wî bawer dikir û ji bo wan şer bikin.
Giyanê wî di aştiyê de bimîne û bîranîna wî herheyî ne."
YNK: Ji bo mirina Salih Muslim ji hemû hevrê, dost, heval û alîgirên wî re sersaxî xwest
Mekteba Siyasî ya YNK’ê ragihand ku Salih Muslim mînakekî girîng ji bo têkoşîna mafên gelê Kurd li Rojava û avakirina ezmûna xweseriya demokratîk a gelê me li wê beşê Kurdistanê pêşkêş kir.
YNK ji bo wefata siyasetmedarê Kurd û hevserokê berê yê PYD’ê Salih Muslim peyamek sersaxiyê weşand.
Peyama Mekteba Siyasî ya YNK’ê wiha ye:
"Em sersaxiyê ji malbata têkoşer û siyasetmedarê Rojavayê Kurdistanê, Endamê Desteya Hevserokatiya PYD’ê Birêz Salih Muslim û hemû hevrê, dost, heval û alîgirên wî re dixwazin.
Birêz Salih Muslim, ji destpêka Şoreşa Gelê Sûriye û Rojavayê Kurdistanê ve, bi rêya Partiya Yekîtiya Demokratîk (PYD) û têkoşerên din di têkoşîna mafên gelê Kurd li Rojava de û avakirina ezmûna rêveberiya xweser de mînakekî girîng pêşkêş kir.
Salih Muslim her wiha bavê Şehîd Şervan e ku jiyana xwe ji bo azadiya welat feda kiriye.
Koça dawî ya vî têkoşerê gelê me, windahiyeke ji bo têkoşîna Rojava û demokratîkbûna Sûriyeya nû ye."
DEM Partî: Salih Muslim dê wekî şehîdê azadî û demokrasiyê bijî
DEM Partiyê ragihand ku wan bi xemgîniyeke mezin bihîstiye Salih Muslim koça dawî kiriye û di daxuyaniya xwe de ev peyam da:
"Me bi xemgîniyeke mezin bihîst Endamê Konseya Hevserokatiya PYDyê Salih Muslim koça dawî kiriye.
Em sersaxiyê ji malbata wî û ji gelê xwe re dixwazin û di vê rêya ku temenê xwe di xebata azadiyê de derbas kiriye, bi rêz û hurmet wî bibîr tînin.
Mîrateya berxwedanê ya Salih Muslim wê bibe ronahî ji bo her kesê ku dilê wî ji bo azadiya gelê wî lêdide.
Salih Muslim wê di bîra gelan de, bi taybetî jî di bîra gelê Kurd de, wekî şehîdê azadî û demokrasiyê her bijî.”
Di dawiya peyama sersaxiyê de wiha hat gotin, "Oxir be hevalê hêja, bîranîna berxwedana te wê her û her rêya me ronî bike."
Tevgera Goran: Salih Muslim sembola berxwedan û fedekariyê bû
Tevgera Goran ji bo wefata Salih Muslim peyamek sersaxiyê weşand û got: “Ew ne tenê rêberekî siyasî bû, lê di heman demê de sembola berxwedan û fedakariyê bû. Wek bavekî şehîd, êşa gelê xwe bi kûrahî hîs kir û têkoşîna rizgariya neteweyî bi xwîna hezkiriyên xwe û hevalên xwe pîroz kir.”
Elî Heme Salih: Peyama sersaxiyê ji bo Salih Muslim xwest
Her wiha Biryarderê Tevgera Helwest, Elî Heme Salih têkildarî wefata Endamê Desteya Hevserokatiya Partiya Yekîtiya Demokratîk (PYD) Salih Muslim di hesabê xwe ya Facebookê de peyameke sersaxiyê weşand.
Elî Heme Salih di peyama xwe de ji ber wefata Salih Muslim sersaxî xwest û got: "Salih Muslim ji bo doza rewa yê gelê Kurd bi awayekî rastegoyî têkoşiya."
Wehab Helebceyî: Windakirina bavê Welat ji bo gelê me bûyereke trajîk e
Berpirsê Hêzên Dijî Terora ê Silêmaniyê Wehab Helebceyî ji bo wefata Salih Muslim peyameke sersaxiyê weşand û tê de got: “Windakirina Bavê Şehîd Welat ji bo gelê me bûyereke trajîk e.”
Wehab Helebceyî ji bo wefata Endamê Desteya Hevserokatiya Partiya Yekîtiya Demokratîk (PYD) û hevserokê berê yê PYD’ê Salih Muslim, di hesabê xwe ya medyaya dîjîtal Facebookê de peyamek belav kir.
Peyama Wehab Helebceyî wiha ye:
"Em ji bo koça dawî ya kesayetiyekî mezin wek heval Salih Muslim sersaxiyê ji gelê xwe yê li Rojavayê Kurdistanê û Kurdistana mezin re dixwazin.
Windakirina Bavê Şehîd Welat (Salih Muslim) ji bo gelê me bûyerek trajîk e. Lê em piştrastin ku gelê Kurd gelek mirovên din ên mezin li ser piyan hene, da ku cihê heval Salih Muslim vala nemîne."
