Rojnameya New York Times, eşkere kir ku Rêberê Bilind ê Îranê Elî Xameneyî, Elî Larîcanî yek ji kesayetiyên herî pêbawer ên xwe ji bo birêvebirina Îranê erkdar kiriye.
Ev biryar piştî zêdebûna îhtîmala pevçûnekê di navbera Îran û Amerîkayê de û îhtîmala terora rêberê Îranê û kurê wî Mucteba Xameneyî hatiye dayîn.
Ji dema ku xwepêşandan li Îranê dest pê kirin, Elî Larîcanî serokê niha yê Konseya Bilind a Ewlekariya Neteweyî, rêveberiya Îranê girtiye ser xwe.
Xameneyî komek biçûk di şûna xwe de erkdar kiriye
Hin rayedaran zêde kirin ku Elî Xameneyî talîmatên hişk dane Larîcanî û hejmareke biçûk ji hevkarên wî yên siyasî û leşkerî.
Ev talîmat da ku bikaribin mayîndebûna dewleta Îranê li hember her êrîşekê misoger bikin.
Rayedaran rave kirin ku fermanên Xameneyî ji bo her payeyeke leşkerî an hikûmî çar cîgir destnîşan kirine.
Her wiha Rêberê Îranê desthilat daye komeke biçûk ji hevkarên xwe yên nêzîk da ku di rewşa qutbûna têkiliya wî an mirina wî de, biryaran bidin.
Hemî hêzên Îranê niha di asta herî bilind a hişyariyê de ne
Îran niha li ser bingeha ku êrîşên Amerîkî nêzîk in, tevdigere û hemî hêzên leşkerî yên Îranê niha di asta herî bilind a hişyariyê de ne.
Larîcanî di serê lîsteyê de ye
Li gorî ku hatiye eşkerekirin, Larîcanî di serê lîsteyê de ye, li dû wî serokê parlamentoyê Mihemed Baqir Qalîbaf û Serokkomarê berê Hesen Rûhanî hene.
Ev pêşketin di demekê de tên ku tevgera leşkerî ya Amerîkî li herêmê zêde bûye, di heman demê de Îran jî di hişyariyeke bilind de ye.
