Berdevkê Fermî yê Hêzên Çekdar ên Yemenê lîwa herêmî Macid Ebdullah El-Nezîlî, di daxuyaniyeke fermî de ragihand ku bajarê Moxa û bendergeha wê ya stratejîk rûbirûyî êrîşeke berfireh a milîsên Hûsî ya bi mûşek û dronan bûye. Li gora zanyariyên artêşê, di vê êrîşê de 4 serbazên artêşa hikûmetê û 3 sivîlan canê xwe ji dest dane.
El-Nezîlî diyar kir ku armanca êrîşê rasterast cihên sivîl, binesaziya bajêr, herêmên niştecihbûnê û xetên serekî yên elektrîkê bûn. Hêzên parastina asmanî ya Yemenê karîn 11 dronên Hûsiyan beriya ku bigihîjin armancên xwe bixin xwarê. Her wiha hat ragihandina ku piraniya 30 birîndaran sivîl in û piştî wergirtina alîkariya bijîşkî ji nexweşxaneyan hatine derxistin.
Li aliyê din, berdevkê leşkerî yê Hûsiyan, Yehya Serî, îdîa kir ku wan li herêmê "kombûnên serbazî û embarên çekan ên Erebistana Siûdî" kirine armanc.
Ev êrîşa li ser bendergeha Moxayê ku nêzîkî tengava stratejîk a Bab el-Mendeb e, ji aliyê hikûmeta Yemenê ve wekî "pêleke nû ya terorê û binpêkirina yasayên navdewletî" hat şermezarkirin.
Artêşa Yemenê tekez kir ku ev êrîş êrîşeke li ser tevahiya saziya leşkerî ye û wan hêz û şiyana bersivdayîna tund li dijî çavkaniyên gefan heye.
