Zext û heqaret li meydana bajêr
Bûyera nexweş li Meydana Trabzonê qewimî. Di dîmenên ku li ser medyaya civakî belav bûn de hat dîtin ku komek kes li dora jineke bi formaya Amedsporê kombûne. Êrişkaran bi gotinên wekî "terorîst", bi bi xeber û gotinên derveyî rêzê zext li jinê kirin ku formaya xwe ji xwe bike. Jin li hemberî vê êrişa devkî bertek nîşan da û got: “Ez ne terorîst im, ez ji Amedê me. Hevjînê min jî ji Antalyayê ye.”Ji bo ku bûyer zêdetir mezin nebe, hevjînê jinikê ku formaya Beşiktaşê li xwe kiribû, tîşortê xwe derxist û bi ser formaya Amedsporê ya hevjîna xwe de kir da ku wê biparêze û veşêre.
Amedspor: Em ê berpirsan bidên dadgehê
Piştî belavbûna dîmenan, Rêveberiya Amedsporê daxuyaniyeke fermî belav kir û êriş bi tundî şermezar kir. Klûbê destnîşan kir ku lixwekirina formayê nîşaneya hezkirinê ye û nabe ti kes ji ber vê yekê rastî zextan bê. Amedsporê banga lezgîn li dezgehên dadwerî kir û eşkere kir ku wan bixwe jî bi fermî serî li rêyên hiqûqî daye da ku berpirs werin cezakirin.
Banga Aramî û Werzişvaniyê
Klûbê di daxuyaniya xwe de bal kişand ser yekparebûna werzişê û diyar kir ku ev tevgerên takekesî nikarin li ser navê hemû bajarekî an klûbekê werin hesibandin. Di daxuyaniyê de hat xwestin ku ji bo lîstika pêş de ne alozî, pêşdarazî û dijminatî, lê belê hêza yekgirtî û rêzgirtina futbolê derkeve pêş. Rêveberiyê bang li hemû alîgiran kir ku bi hişmendî û aramî tevbigerin daku rê li ber kûrbûna krîzan were girtin.
