Tora Têkiliyên Dijqanûnî û Xirabkarîya Hêza Giştî
Piştî ku Serdozgeriya Komarê ya Dêrsimê di sala 2026’an de dosya ji nû ve girt dest, lêkolînên ser materyalên dîjîtal rêça lêpirsînê guhert. Di encama analîza peyam û talîmatên di navbera Waliyê berê yê Dêrsimê Tuncay Sonel û polîsê berê Gökhan Ertok de, hate tespîtkirin ku toreke têkiliyan a dijqanûnî hatiye avakirin. Dozgeriyê diyar kir ku di vê pêvajoyê de hêza giştî bi zanebûn ji bo veşartina tawaran û reşkirina delîlan wekî amrazek hatiye bikaranîn.
Malbata Waliyekî û Polîs di Nav de: 28 Girtî
Lêpirsîna ku berfireh bû, gihîşt astên bilind ên burokrasiyê. Waliyê berê Tuncay Sonel di meha Nîsanê de hate girtin û di meha Tîrmehê de ji çar sûcên cuda yên nû biryara girtina wî hat dubarekirin. Di çarçoveya vê dosyayê de, hevjîna Sonel Handan Sonel, kurê wî Mustafa Turkay Sonel û gelek polîsên berê û yên hîna li ser wezifeyê tên darizandin. Bi pêvajoya dawî re, hejmara girtiyan di destpêka meha Tebaxê de derket 28 kesan.
Qeydên Ducaniyê yên li Nexweşxaneyê bi Profesyonelî Hatine Jêbirin
Yek ji skandalan herî mezin a di dosyaya nû de, jêbirina qeydên tibî yên Gulistan Doku yên li Nexweşxaneya Dewletê ya Dêrsimê ye. Serdozgeriya Komarê ya Erzurumê tespît kir ku Doku beriya windabûna xwe bi gumanbûna ducaniyê li nexweşxaneyê hatiye muayenekirin, lê ev qeyd bi awayekî profesyonel hatine jêbirin. Ji ber reşkirina van delîlan, di meha Tîrmehê de li dijî 10 xebatkarên tendurustiyê ku di nav wan de 3 bijîşk, pisporên agahdariyê, 5 operatorên daneyan û hemşîreyek hene, operasyon pêk hat.
