Parlementera Partiya Demokrasî û Wekheviya Gelan (DEM Partî) Pervîn Buldan, ji bo ronîkirina cînayetên siyasî yên salên 1990'î gaveke nû avêt. Buldan, ji bo dîtina kujerên hevjînê xwe Savaş Buldan û karsazên Kurd Adnan Yildirim û Hacî Karay ku di 3'yê Hezîrana 1994'an de hatibûn revandin û qetilkirin, bi fermî serî li Wezareta Dadê ya Tirkiyeyê da.
Di serlêdana ku ji aliyê parêzeran ve hat kirin de hat diyarkirin ku daxuyaniyên dawî yên hin rayedarên berê yên dewletê û daxuyaniyên di çapemeniyê de derketine, wekî "delîlên nû" û "îtîrafên eşkere" tên pejirandin. Di daxwaznameyê de hat destnîşankirin ku divê ev îfade û agahî wekî daxwazeke hiqûqî werin nirxandin û ji bo derxistina holê ya berpirsên li pişt van kuştinan lêpirsîneke berfireh were destpêkirin.
Pervîn Buldan li ser hesabê xwe yê medya civakî ragihand ku ew ê heta dawiyê şopandina vê dozê bikin û destnîşan kir ku bêyî rûbirûbûna bi raboriyê û ronîkirina van cînayetên tarî, edalet li welat bi cih nabe. Hat ragihandin ku parêzerên malbatê daxwaz dikin ku lijneyeke serbixwe ya lêkolînê were avakirin û hemû belgeyên di arşîvên dewletê de yên têkildarî vê rûdanê werin eşkerekirin.
