Hat Nûkirin: Li navçeya Tûrgûtlû ya parêzgeha Manîsayê, di roja yekem a destpêkirina dibistanan de rûdanek qewimî. Li gorî agahiyên ku hatine ragihandin, kesekî çekdar êrîş bir ser Lîseya Pîşeyî û Teknîkî ya Încî Uzmez. Di encama gulebaranê de, li gorî tespîtên destpêkê 4 xwendekar birîndar bûn. Piştî bihîstina dengê çekan, li herêmê panîkeke mezin çêbû û gelek malbat bi fikar berê xwe dan ber deriyê dibistanê da ku li rewşa zarokên xwe bipirsin.
Walîtiyê Daxuyanî Da: Êrîşkar Hat Girtin
Walîtiya Manîsayê derbarê bûyerê de daxuyaniyeke fermî weşand. Di daxuyaniyê de hat diyarkirin ku giliyê êrîşê vê sibê di saet 07:59'an de gihîştiye hêzên ewlehiyê. Walîtiyê destnîşan kir ku bi giştî 8 kes ji vê bûyerê bandor bûne, lê belê derbarê asta birîndarbûnê an jî fikarên li ser windahiya canî de agahiyeke berfireh parve nekir. Di daxuyaniyê de hat ragihandin ku kesê êrîşkar ji aliyê hêzên ewlehiyê ve hatiye girtin û binçavkirin. Her weha lêpirsîna berfireh a derbarê bûyerê de berdewam dike.
Çeka bi Pompe û Fikarên Ewlehiyê
Her çend nasnameya êrîşkar bi fermî nehatibe eşkere kirin jî, di hin dîmenên ku li ser torên civakî hatine parve kirin de xuya dika ku êrîşkar kesekî ciwan e û çeka bi pompe di destê wî de ye.
Ev êrîş, komkujiyên sala borî yên li ser dibistanên Gurgum û Rihayê anî bîra mirovan ku tê de 10 kesan jiyana xwe ji dest dabûn û 31 kes jî birîndar bûbûn. Tevî ku piştî wan bûyeran biryarên nû yên ewlehiyê li dibistanan hatibûn girtin jî, êrîşa îro ya li Manîsayê careke din fikarên civakê yên li ser ewlehiya li saziyên perwerdeyê derxistin lûtkeyê.
