Ozgur Ozel li Odeya Civînên Lijneya Rêveberiya Koma Parlamentoyê bi Parlamenteran re civiya.
Ozel bi Cîgirên Serokê Koma CHP’ê Murat Emîr û Gokhan Gunaydin û Parlamenterê berê yê CHP’ê Îlhan Cîhaner re beşdarî civînê bû.
Civînê di saet 11:35'an de dest pê kir.
Piştî civînê der barê kombûnê de Parlamenterê CHP'ê yê Stenbolê Zeynel Emre li Meclisa Mezin a Tirkiyê, daxuyaniyeke çapemeniyê da.
Zeynel Emre ragihand ku ew ê ji bo lidarxistina kongreyeke awarte û ji bo destnîşankirina komîteyekê ji bo bangkirina kongreyê, wê sibe serî li dadgehê bidin û wiha domand:
"Îtîraza me ya li dijî biryara betalkirinê li Dadgeha Bilind berdewam dike.
Ji bo ku em bibînin ku Tirkiye bi kêmanî nîşanên dewleteke hiqûqê nîşan dide, em dixwazin biryara Dadgeha Bilind bibînin û bibihîzin.
Girîng e ku ev biryar berî ku dadwerî bikeve nav betlaneyê were dayîn."
Rûniştina biryarê di doza Şaredarê Beykozê Alaattin Koseler de
Di heman demê de îro darizandina Şaredarê Beykozê Alaattin Koseler, Serokê berê yê Karmendên wî Velî Gumuş û hin berpirsên şîrketê, ku bi sûcê sextekariya îhaleyan tên tawanbarkirin, gihîştiye qonaxa xwe ya dawî.
Alaattin Koseler, ku piştî 20 salan ji nû ve wekî Şaredarê Beykozê hat hilbijartin, di 27'ê Sibata 2025'an de, 11 meh piştî hilbijartina xwe, bi tohmetên "xirab bikaranîna wezîfeyê", "zordestî" û "avakirin, endambûn û alîkariya rêxistinekê ji bo kirina sûcan" hat girtin.
Tam du meh piştî girtina wî, îdianameya li dijî Koseler hate temamkirin û ji aliyê Dadgeha Cezayê Giran a 17'emîn a Anadolu ya Stenbolê ve hat qebûlkirin.
Rûniştin dê di 13, 14, 16 û 17'ê Tîrmehê de jî berdewam bikin.
Yekemîn rûniştina doza Şaredariya Gaziosmanpaşa dest pê kir
Li aliyekî din jî yekemîn rûniştina doza Şaredariya Gaziosmanpaşa, ku ji lêpirsîna sûcên rêxistinkirî ya Aziz İhsan Aktaş hatibû veqetandin, îro hat dîtin.
Doz Dadgeha Cezayê Giran a 10'emîn a Stenbolê ku doz pê ve girêdayî bû, hat lidarxistin.
Di dozê de bi tevahî 9 kes tên darizandin, di nav wan de Şaredarê Gaziosmanpaşa Hakan Bahçetepe û Cîgirê Sekreterê Giştî yê Şaredariya Bajarê Mezin a Stenbolê, ku di girtîgehê de felc derbas kir Erdal Celal Aksoy jî heye.
Îdianameya ku ji hêla Serdozgeriya Komarê ya Stenbolê ve hatibû amadekirin, 343 roj piştî girtina Bahçetepe hate temamkirin û radestî dadgehê hate kirin.
Bersûc bi sûcên bertîlxwarinê, navbeynkariya bertîlxwarinê, şûştina pereyan û dewlemendkirina neheq hatin tawanbarkirin.
