Serokê Herêma Kurdistanê Nêçîrvan Barzanî serpereştiya civîneke bilind a leşkerî û ewlehiyê kir.
Di civînê de êrişên bi dron û mûşekan ên li ser Başûrê Kurdistanê hatin şermezarkirin û daxwaz ji Bexdayê hat kirin ku rê li ber wan êrîşan were girtin.
Li gorî daxuyaniya Serokatiya Herêma Kurdistanê, di civînê de Wezîrê Pêşmergeyan, Wezîrê Karên Navxwe, Sererkanê Pêşmergeyan û fermandarên bilind amade bûn.
Di civînê de bi hûrgilî bipêşketinên ewlehiyê yên dawî yên herêmê, encamên şer û bandorên wê yên metirsîdar ên li ser Başûrê Kurdistanê hatin gotubêjkirin.
Nêçîrvan Barzanî di civînê de dubare kir ku Başûrê Kurdistanê wê bi ti awayî nebe beşek ji şer û aloziyan.
Her wiha Barzanî tekez kir ku parastina aramiya welêt wê di rêza yekem a karan de be.
Serokê Herêmê da zanîn ku wê bi ti awayî rê neyê dayîn ku xaka Başûrê Kurdistanê bibe çavkaniya gef û metirsiyê ji bo Komara Îslamî ya Îranê yan her welatekî din ê cîran.
Di wê çarçoveyê de tekezî li ser wê yekê hat kirin ku Hikûmeta Federal a Îraqê berpirsyar e ku erka xwe bi cih bîne ji bo rêlibergirtina wan êrişan, dîtin û cezakirina encamderên wan.
Her wiha di civînê de gelek rêbazên ji bo xurtkirina parastina asayîş û aramiya Başûrê Kurdistanê û şêwaza dezgehên ragihandinê ya li gel rûdan û pêşhatan hatin dayîn.
